ቴክኒክና ሙያ ሥልጠናን በዲጂታል ቴክኖሎጂ …
ቴክኒክና ሙያ ሥልጠናን በዲጂታል ቴክኖሎጂ ማዘመን ብቁና ተወዳዳሪ የሰው ኃይል ለማፍራት ወሳኝ ነው የቴክኒክና ሙያ ሥልጠናን በዲጂታል ቴክኖሎጂና በአርቴፊሻል ኢንተለጀንስ (AI) የታገዘ ማድረግ የሥልጠና ጥራትን ለማሳደግና ከሥራ ዓለም ፍላጎት ጋር የተጣጣመ የሰው ኃይል ለማፍራት ወሳኝ መሆኑ ተገለጸ። የሥራና ክህሎት ሚኒስቴር ከዩኔስኮ ጋር በመተባበር በዲጂታል ቴክኖሎጂና በአርቴፊሻል ኢንተለጀንስ(AI) የታገዘ የሥልጠና ሥርዓትን ተግባራዊ ለማድረግ የፌዴራልና የክልል የስልጠና ባለሙያዎች፣ ለኮሌጅ ዲኖች፣ ለአሰልጣኝ መምህራን የአቅም ግንባታ ሥልጠና እየሰጠ ይገኛል። በመድረኩ መልዕክት ያስተላለፉት የሥራና ክህሎት ሚኒስቴር የቴክኒክና ሙያ ዘርፍ ሚኒስትር ዴኤታ አማካሪ አቶ አዝመራ ከበደ፣ የዲጂታል ቴክኖሎጂን ከሥልጠና ሥርዓቱ ጋር ማቀናጀት የትምህርት አሰጣጡን ዘመናዊና አካታች ከማድረጉም በላይ የአሰልጣኞችንና የሰልጣኞችን አቅም ለማሳደግ እንደሚያግዝ አስገንዝበዋል። እንደ አቶ አዝመራ ገለጻ፣ በሥልጠና ሥርዓቱ አርቴፊሻል ኢንተለጀንስ መጠቀም ተወዳዳሪና ብቁ ሰልጣኞች ከማፍራት ቀለል ያሉ ማሰላሰል በሚያስችሉ ጨዋታዎች ላይ የተመሠረቱ የማስተማሪያ ዘዴዎችንና ማስመሰያዎችን(simulations) መጠቀም የሰልጣኞችን ተሳትፎ በማሳደግ በቀላሉ እውቀትን ወደ ተግባር እንዲቀይሩ ያግዛል። ቅይጥ ትምህርት (Blended Learning) አተገባበርም የፊት ለፊት ትምህርትን ከዲጂታል ትምህርት ጋር በማቀናጀት የመማር ሂደቱን የሚያቀላጥፍና የሥልጠና ጥራትን የሚያሳድግ አሰራር መሆኑ ተጠቁመል። በዚህ ረገድ፣ ለክልል ቢሮዎች፣ ለሲኦሲ ማዕከላትና ከ70 በላይ ለሚሆኑ ፖሊቴክኒክ ኮሌጆች የዲጂታል መሠረተ ልማት መሟላቱንና ከ500 በላይ መምህራን በአዳዲስ የማስተማር ዘዴዎች ላይ ሥልጠና ማግኘታቸውን አቶ አዝመራ ገልጸዋል። አያይዘውም፣ የዲጂታል ሥልጠና ሥርዓቱ ውጤታማ እንዲሆን የክልል ቢሮዎች፣ የኮሌጅ አመራሮችና አሰልጣኞች የባለቤትነት ሚናቸውን በመወጣት የተጀመሩ ሥራዎችን በቀጣይነት መከታተልና ማስፋፋት እንደሚገባ አሳስበዋል።
